Posted on
23 November 2010
Dit was ‘n opgeruimde groep VLV vroue wat vroegoggend na Vredendal vertrek het vir ‘n heerlike uitstappie.
Ons het heel eerste die roosplaas besoek van Dawie en Louwna Fourie. Hulle het reeds vroeg voor ons aankoms hul rose gepluk. Dawie het ons ingelig oor hoe hulle te werk gaan met die pluk en versorging van die bome en die rose.
By Dina Grobbelaar, wat net buite Vredendal op ‘n kleinhoewe woon, is ons behoorlik geŃ—nspireer deur haar pragtige tuin. Dis beslis ‘n voltydse werk en vereis hope, en hope liefde vir tuinmaak. Onder ‘n massiewe ou Koraalboom het sy vir ons heerlike koue koeldrank bedien – net wat ons nodig gehad het op die warm somersdag .
Luzanne Kwekery is meer as net ‘n kwekery. Hulle ‘boer’ ook met Malvas. Randie Smit het ons vertel hoe die olie uit die Malvas gepers word. Klink vir ons na die ideale boerdery. Hier het ons ook die lekkerste sjokolade- en kaaskoek geëet.
Die middag is afgesluit met ‘n heerlike middagete en tuisgebakte brood onder die lapa op Draaihoek se Wildplaas van Jan en Renske van Zyl. Die lapa is teenaan die watergat waar die diere kom water drink.
Baie dankie aan Betsie, Heidi en Mandie wat die puik reëlings getref het. Dit was ‘n heerlike dag. Ons maak weer so.
Beriggewer: Irma van Niekerk
VLV "malvas" in die malvaland, waaruit olie onttrek word.
Fraaie dames in Dina Grobbelaar se tuin.
Dawie Fourie, doring van die roosplaas.
In vrolike luim in Draaihoek se lapa.
