Die VLV dames van Piet Plessis het seker gemaak dat die sokkergees nie by hulle verbygaan nie! Om hulde te bring aan SA se aanbieding van die FIFA Sokker Wêreldbeker 2010, het die dames hul eie sokkerdag gehou. Hulle kon tot hulle sokkerkennis toets met ‘n vasvra en die omgewing se jongspan was uitgedaag om deel te neem.

Hier wys Celsey Brown, Rachelle Harvey, Elda Brown, Lynne Harvey en Lize Brown hoe daar gees gevang is!

Die geskrewe woord: Gesing, gedig, gerym, gepraat
 

Die Kunste en Handvlyt vergadering was 'n heerlike oggend en almal wat die vergadering bygewoon het, het dit terdeë geniet!  Die tafels was gedek in wit en swart en musieknote het die tema orals uitgebeeld.  Die Sameroeper, Hennah Greeff, en haar groep was ook almal geklee in wit en swart.
 

Sarie Koegelenberg het die voorlesinge gedoen uit van haar boeke wat sy geskryf het oor die Sandveld en sy mense.  Al die pittighede wat sy neergepen het, het groot byval gevind by die lede.  Elna du Toit van Dwarskersbos het 'n paar pragtige "golden oldies" gesing en o.a. ook een van Sarie se gedigte wat sy getoonset het.  Een van ons lede , Elma Oberholzer het haar storie oor die Moderne Rooikappie en Liewe Heksie voorgelees.  Almal het dit baie geniet.  Die wolf het ouma se "skipants" aangehad en Liewe Heksie het hard op haar vuvuzela geblaas.  Heleen Eigelaar het ook 'n voorlesing gedoen oor die "Moderne Ouma"  Dié twee lede het beslis talent!
 

By hierdie vergadering het ons 43 kompetisie inskrywings gehad!  'n Rekord vir Langebaan.  Die twee beoordelaars moes bontstaan om al die inskrywings te beoordeel.  Ons het ook tydens die vergadering ons 81ste lid bygekry.
 

Tydens die vergadering is 'n kombersie aan Cora du Toit oorhandig.  Sy mis nooit 'n vergadering nie, al is sy nie baie gesond nie.  Sy sê dis vir haar die hoogtepunt van die maand om VLV toe te kom.  Die lede het ywerig deelgeneem aan die breiprojek en 'n groot aantal blokkies is gebrei.  Ongeveer 25 kombersies is uitgedeel in die gemeenskap.
 

Christa Steyn, Saamroeper van Gesondheid oorhandig die kombersie aan Cora du Toit.

Die voorsitterstafel, pragtig versier om by die tema te pas.

Henna Greeff, Saamroeper van Kunste en Handvlyt stel die sprekers aan ons voor.  Van links na regs verskyn op die foto:  Heleen Eigelaar, Elma Oberholzer,  Elna du Toit en Sarie Koegelenberg.

Die Kunste en Handvlyt groep.

Nellie Viljoen het nuus gestuur oor Vryburg se Openbare Sake vergadering.

Louwna Pretorius, plaaslike raadslid, het Vryburg VLV besoek om lede in te lig oor probleme wat tans in plaaslike munisipaliteit bestaan. Dienslewering bly ‘n probleem maar alle klagtes wat via haar aangemeld word, sal die nodige aandag kry. Kiesers word gemaan om seker te maak van hul registrasie as kiesers met die oog op die plaaslike verkiesings wat in 2011 sal plaasvind.

Dit is elke inwoner se reg en voorreg om te gaan stem.

Maryke van der Westhuizen het ‘n werkklas aangebied in teesakkie-vouwerk wat baie byval by lede gevind het. Verskillende voumetodes is geoefen om later op kaartjies te gebruik.

By die geleentheid is erelidmaatskap van die tak toegeken aan Tannie Irene van der Vyver. Sy is reeds 40 jaar lid van die tak en was vir 25 jaar die tesourier.

Maryke, Sannie Retief (aanbieder van die vergadering) en Louwna Pretorius

Hester Pretorius (voorsitter) en Irene van der Vyver

Vyf lede van Vryburg VLV het die jaarlikse kongres in Kimberley bygewoon.
Almal het die kongres terdeë geniet, dankie Kimberley en Griekwaland-wes vir al ons geskenkies!

Memory Scholtz, Nellie Viljoen (sekretaris), Sannie Retief (visevoorsitter), Gezina Bruwer, Hester Pretorius (voorsitter)

VLV-lede en gaste kon met die Augustus-vergadering van die VLV-tak van Villiersdorp met twee baie interessante handvaardighede kennismaak.

Romilly Neil, “that friendly Irish woman”, het demonstreer hoe sy op glas verf. Sy verf verkieslik op enige wit oppervlakte wat geglasuur is: bekers, borde, teëls, ens. ‘n Verskeidenheid kleure is in poeiervorm verkrygbaar en slegs ‘n mespunt word op ‘n slag met ‘n kleefmiddel en water op ‘n glaspalet vermeng. Met ‘n verftegniek soos Japanese verfwerk wat net uit ligte hale bestaan word die prentjie met Chinese bamboeskwassies met natuurlike haar, opgeverf. Dan pak Romilly die klaargeverfde artikels in ‘n klein hoogoond(kiln) waar dit vir drie uur teen 800 C gebak word. Dan koel dit vir tien uur af waarna die oond eers oopgemaak mag word. Nadat die artikels gevuur is, lyk die kleure weer soos toe die verf nat was.

Daarna het Suzette van Rooyen van Caledon demonstreer hoe om die baie gewilde tegniek van teesakkie-vou te bemeester. Goed voorberei kon sy vir belangstellendes elkeen agt stukkies papier gee wat sy vooraf in vierkantjies geknip het. Nog vorms wat gebruik kan word, is driehoeke, vlieërvorms en diamante. Nadat die papiervorms gevou is, word dit uitgelê en met ‘n klein metaal”stud” aanmekaar gesit. Dit word dan baie doeltreffend gebruik om handgemaakte kaartjies, geskenksakkies, ens te versier. Net die soort vaardigheid vir die vrou wat haar persoonlike stempel wil afdruk.

Romilly verf die fynste donsveertjies op ‘n teël

Romilly Neil(heel links) saam met Issie van Deventer, Dileanna Cronjé en Antoinette Stoutesdÿk by die pragtige uitstalling van haar werk.

Suzette van Rooyen(regs) besig om vir Johanni Barnard, Jean van Coppenhagen, Emily Klink en Elsabé Stemmet die fynere kuns van teesakkie-vou te verduidelik.

Wellington se dames het meer gehoor van ‘n onderwerp wat letterlik en figuurlik na aan elke vrou se hart lê, naamlik die bra.  Die twee sprekers was Valerie en Portia van Triumph.  Ons het geleer hoe om ‘n bra te kies, sowel as die versorging daarvan.

Dit is die belangrikste kledingstuk in ‘n vrou se kas, want dit ondersteun die borste en sorg vir ‘n mooi voorkoms.  Vir sport wat nie te veel beweging van die liggaam vra nie, is daar ‘n bra wat matige ondersteuning gee. Vir sportsoorte waarmee die deelnemer baie moet spring en beweeg, is die ferm bra die beste keuse.  Vir die voller figuur is daar ‘n goeie verskeidenheid om van te kies. Die jonger meisie kan wegkom met dun bandjies, maar hoe groter die borste, hoe breër moet die bandjies wees.

Die versorging is baie belangrik. Warm water en versagmiddels is beslis nie goed vir diè spesifieke kledingstuk nie. Dit maak die materiaal pap.  Die groen koekie Sunlightseep is die beste om te gebruik en sorg ook wonderlik vir die hande.  ‘n Bra wat draad in het, moet egter nie geweek word nie, dit sal roes, deur die matetiaal begin steek en seermaak.  Sonlig is ook skadelik vir die ou stukkie lap, kant en rek.

Dalk, net dalkies, huur ons tak ‘n bus en ry na die Strand waar die spesifieke winkel en die kundige twee sprekers is, dan koop ons elkeen ‘n paar goeie bra’s, sodat ons rondborstig kan vergadering hou en elkeen ‘n hupstoot in ons selfvertroue kan kry. 

Petro Greeff

Ons as lede van die George tak is baie trots op die Garden Route Mall wat 'n baie gerieflike, veilige en netjiese inkopie-ervaring bied. By 'n onlangse vergadering het die lede versoek dat ons 'n voorstel maak aan die bestuur van die Mall.

In die omgang word dit dikwels genoem dat daar mense is wat probleme ondervind om hul motors op die parkeerterrein te vind. Indien die parkeerruimte in blokke, volgens die alfabet gemerk word, sal dit help om hulle parkeerplek te identifiseer. Dit kan ook bydra tot verdere veiligheid van die parkeerruimte asook hulp in noodgevalle.

Verlede maand is die blokke in die parkeerruimte geletter!!! Ons het groot waardering en dis 'n riem onder die hart om te weet dat ontwikkelaars die kliente se behoeftes en versoeke ag. Op 11 Augustus het ons persoonlik gaan dankie se.
 

Geletterde parkeerruimte

Hannetjie Raath, Openbare Sake sameroeper, Rion Olivier, bestuurder GRM, Henriette Stander, voorsitter

VLV Gansbaai het geskiedenis gemaak toe hul Opvoedingsaand in die restaurant van Academia Hoërskool plaasgevind het. Dit het dan ook lede die geleentheid gebied om nader kennis te maak met Gansbaai se nuwe hoërskool. 

Mnr Tommy Wilson, die nuwe skoolhoof sedert Julie 2010, is met tipiese VLV-warmte verwelkom.  Hy is bederf met ‘n pakkie wat van ‘n potjie konfyt - vir die soet in die lewe, tot ‘n wyntjie - om te kan filosofeer, tot ‘n gebed vir ‘n onderwyser - om wysheid en geduld, bevat het. Hy vertel dan ook dat sy koms na Gansbaai werklik ‘n roeping is om Gansbaai Academia ‘n skool van uitnemendheid te maak.

Vervolgens kon die besoekers die pragtige sang o.a. “Unchained Melody” van die skoolkoor o.l.v Liezel Mostert geniet.

Anneri Harding-Male, die onderwyseres in Gasvryheidstudie, vertel hierna met groot geesdrif  hoe die leerders in hierdie vak opgelei word om reeds op skoolvlak met die industrie kennis te maak  Hul leer nie net om die kos voor te berei nie, maar word ook opgelei om ‘n aangename atmosfeer te skep op ‘n bekostigbare wyse en die geregte op ‘n smaakvolle wyse voor te sit. Die leerders kry geleentheid om dit wat hul in die teorie leer op hul restaurantaande, wat op ‘n Woensdagaande plaasvind, prakties toe te pas. Op ‘n toer deur die kombuis moes almal saamstem dat dié modern toegeruste kombuis elke sjef se droom is!

‘n Mens voel werklik dat met sulke entoesiastiese en toegewyde leerkragte elke leerling van Academia inderdaad die geleentheid kry om hul vlerke te sprei, soos die leuse van die skool lui. Belangrik is egter dat ‘n skool nie kan floreer as dit nie die ondersteuning van sy gemeenskap geniet nie.

Gansbaai Spar het vir heerlike nostalgie gesorg deur ‘n kosblikkie met gesonde lekkernye aan die besoekers te voorsien vir teetyd. Dankie Spar! Die besoekers is egter daaraan herinner dat ‘n mens se opvoeding ‘n lewensreis is en nie by die laaste pouse-toebroodjie ophou nie.  Olga Swanepoel se kunsuitstalling kon hiervan getuig. Uit haar skoolhoujare en werk by kwekerye het die belangstelling in Botanie ontstaan. Daaruit het weer die begeerte ontstaan om dit kunstig uit te beeld. Nou hou sy haar sinvol besig met haar belangstellings saamgevat in haar skilderye!

Die aand is afgesluit met ‘n Gansbaai Geskiedenisles.  Daar is vertel van die klok wat op die plaas, Moeraskloof, van oom Danie Fourie, (nou ‘n deel van Korsika) gelui is, as iemand iets in die plaaswinkel benodig het. Dié klok het die begin van die administratiewe deel van die byeenkoms aangedui!

Die volgende VLV byeenkoms vind op Dinsdag, 7 September 2010, in die Pretoriussaal plaas.

Tommy Wilson, Juanita Malan en Eliza de Lange, Opvoeding sameroepster

Anneri Harding-Male

Gentlecare is in Britstown in die Noord-Kaap.  Die dorp het ‘n bevolking van so 6500, met die naaste hospitaal in De Aar, sowat 53km van Britstown. 

Die Sentrum het op die 1 Februarie 2007 geopen.  Ivonne Gentle het al drie haar sussies verloor aan kanker, waarvan haar derde sussie in 2000 die stryd teen kanker verloor het.  Met baie dapperheid en durf het sy die stryd voortgesit om aan te hou met die versorging van terminaal siek mense.  Vir 10 jaar het sy en haar man, Tommie,  van huis tot huis gewerk en besef hoe groot die nood is.  Met die besef is Gentlecare geopen.

Gentlecare sorg tans vir terminale en broos pasiënte. Ons het 11 beddens met 5 vrywillige werkers wat alom die uur diens doen, 24/7.  Die pasiënte kry drie gekookte etes per dag, word elke 4 ure gedraai en verder kry hulle baie liefde en versorging.
         

Gentlecare is as ’n nie-winsgewende organisasie geregistreer, maar moet baie hard werk om kop bo water te hou.  Hulle maak tans seep, handgemaakte kaartjies, scrapbook pakkies,  “maak julle eie kaartjies pakkies” en ’n Gentlecare Blessing armbandjie. Die geld wat verkry word met die verkoop van die produkte word gebruik om Gentlecare te onderhou. Bestellings kan geplaas word via e-pos

Die Opvoeding en Kultuur vergadering onder leiding van Heidi van Niekerk was ’n middag van groot pret en skaterlag.

Die Voorsitter het ’n huldeblyk gebring aan wyle Barbara Conradie, en gesê die bome wat sy tydens een van haar vergaderings geplant het, sal ons altyd aan haar herinner.

Helene Visagie is ’n uiters veelsydige vrou. Haar hande en stem staan vir niks verkeerd nie! Niemand kan ’n storie vertel soos sy nie, en met haar kenmerkende manier het sy ons almal weereens laat skater. Sy het ’n voorlesing gedoen oor Jonas wat graag wou gaan trou, en eers moes bewys dat hy sy Bybel ken. Die omliggende bure kan hulself gerus ’n guns doen en van haar talente gebruik maak. Sy is P U I K!

Heidi en haar span het ’n heerlike middag van ontspanning aangebied deur “Woorde en Wysies van Toeka tot Nou”. Die VLV dames en vele besoekers is in twee groepe verdeel, met Martie Esterhuize en Hettie McGregor as leiers. Irma het musiek vir 30 sekondes gespeel, waarin die dames o.a. 100 titels moes herken. Natuurlik was die dames skitterend, en het hulle die meeste liedjies binne sekondes herken. Die aanbieder Helene Visagie en tellinghouer Rida Visagie het die spanne goed in toom gehou. Koekblikke is op die tafels gesit en die persoon wat die antwoord geken het, moes eers op die koekblik slaan voordat sy kon antwoord. Daar was vier afdelings, met verskillende vrae oor die liedjies. 

Die wenspan het elkeen ’n CD as prys ontvang, wat geskenk is deur Huisgenoot Tempo, asook Klipwerf Orkes. Ons is BAIE dankbaar teenoor hulle.

Eze-sweet het vir ons hulle Aspartame-vry suikervervanger as skenking gegee, wat die dames kon huis toe neem om te toets. Ons sê ook baie dankie aan hulle. Besoek gerus hulle webwerf by www.ezesweet.co.za.

Dit was ’n heerlike middag wat almal geniet het, en nog lank sal onthou.

Baie dankie aan Heidi vir haar aansteeklike geesdrif.

Green Baret's - CD wenners

Heidi en Irma van Niekerk

Helene Visagie

Span 2 - Blue Danubes (Bulle)

VLVK het verlede jaar besluit om 'n spesiale, nuwe portefeulje vir  Huis & Haard te ontwikkel.  Hiermee saam het die webwerf én Huis & Haard 'n splinternuwe, moderne blaadjie omgeslaan.  Deesdae kan ons werklik trots wees op hierdie wêreldgehalte handelsmerke, wat tred hou met nuwe tegnologie en tendense.

Ons lewe vandag in die eeu van die rekenaar,  asof dit die natuurlikste hulpmiddel ter wêreld is. Maar agter die ingewikkelde masjien wat jou in staat stel om hierdie woorde te lees, lê ’n lang en fassinerende geskiedenis.  Tydens die Huis & Haard-vergadering, het Janine Brynard die Hantam VLV-vroue teruggeneem tot by die ontstaan en ontwikkeling van dit wat ons vandag ken as die rekenaar, en daarmee saam ook die wonderlike wêreld van die internet.

Lank voordat wiskundige berekenings met knoppies gedruk kon word om op 'n skerm te verskyn, het die Grieke en Romeine klippies gebruik om te tel.  Oor die eeue heen is allerhande toestelle gebruik om berekeninge te doen, maar die wêreld se eerste volledig elektroniese rekenaar, wat met die Tweede Wêreldoorlog in die 1940's die lig gesien het, het meer as 167 m² volgestaan.  Die koms van die mikroprosesseerder het rekenaars soveel kleiner gemaak dat bekostigbare persoonlike rekenaars teen 1975 hul pad na klein ondernemings, skole en huise regoor die wêreld begin vind het.  Vandag loop mense letterlik met hul rekenaars in hul hempsakke. Voorwaar 'n wonderwerk as in ag geneem word dat hulle eens op 'n tyd 'n paar vertrekke vol gestaan het!

Die Internet is ’n wêreldwye stelsel van rekenaarnetwerke wat met mekaar verbind is en data uitruil.  Dis ’n netwerk van miljoene private en openbare, akademiese, regerings- en sakenetwerke wat verbind word deur glasvesel- en koperkabels, inbelverbindings, Wi-Fi, satteliet, 3G-selfone of kabellose verbindings.  Nadat die World-Wide-Web-projek in 1991 gepubliseer is, het dit 'n wêreldwye fenomeen geword met die karakter van 'n massamedium.  Dit is die mees gebruikte kommunikasiemiddel ooit, omdat miljoene mense vinnige, maklike toegang het tot 'n oneindige verskeidenheid aanlyn inligting, sosiale kletsnetwerke, professionele dienste en aanlyn aankope. 

'n Klompie sprekers het die verskillende internetdienste m.b.t. ons eie VLV tak kom bekendstel, waaronder Sunet Dodd - Internetverbindings; Karien van Schalkwyk - die VLV-webwerf; Margot Steenkamp - ons eie Facebook-profiel; Joey Rootman - Skype; James Basson - SARS E-filing; Bridget Scheffers - Internetbankdienste.  Die doel was nie om enigeen toe te gooi met 'n spul groot woorde en hogere inligting nie.  Slegs 'n breukdeel van die reuse WWW daar buite is beloer, en daar is nog miljuisende ander dinge wat ons kon bespreek.  Maar ons het elkeen goed besef, dat daar 'n legio moontlikhede is om te gaan ondersoek.  Die geheim is egter om nie bang te wees om te eksperimenteer nie.  Meestal klink dit moeiliker as wat dit werklik is, en dis gewoonlik so voor die hand liggend, dat mens maar net die instruksies noukeurig moet volg.  Verbeel jou maar net jy's op 'n internasionale lughawe iewers in Europa... as jy nie lees en oplet nie, sal jy verdwaal.  En as jy dan nou verdwaal, selfs al hét jy goed gelees, geniet dan maar net die reis!  Want 'n opwindende reis is dit gewis...

JCB