Adolene Nel het tydens Hantam VLV se jaareind-vergadering haar Oberammergau-ervaring gedeel. M.b.v. 'n dataprojektor, kon almal saamstap deur groen woude, eeue oue kastele besoek, deur smal kobbelsteen strate drentel en met verwondering na muurskilderye staar. Maar bowenal kon niemand ongeraak staan voor die boodskap van Goddelike genade en versoening wat die 5 000 inwoners van 'n dorpie in die Beierse Alpe in Suid-Duitsland aan die wêreld wil oordra nie.
Volgens Josef Forstmayer is die passiespele "'n poging om die verhaal van Jesus se lyding op 'n sigbare wyse te vertoon aan gelowiges, maar ook ongelowiges, twyfelaars en soekendes." Volgens die honderde duisende mense van regoor die wêreld, wat vanjaar se passiespele in Oberammergau bygewoon het, was dit 'n lewensveranderende, hartgrondige ervaring.
Gedurende die veertiende en agtiende eeu het duisende mense in Europa van die SWART DOOD, die mees gevreesde builepes, gesterf. Voorsorgmaatreëls is getref om die verspreiding daarvan te keer, waaronder peswagters, wat moes keer dat die pes hulle geledere binnesypel. In Oktober 1632 was daar 'n Kerktoewydingsfees in Oberammergau en Kasper Schisler, wat elders gewerk het, het begeer om tuis te wees. Hy het die peswagters gefnuik en by sy familie aangesluit. Kort daarna het hy en talle mense siek geword en gesterf. Desperaat het die kerkleiers 'n gelofte gemaak, om Christus se lyding elke tien jaar met 'n opvoering uit te beeld, indien die plaag sou verdwyn. Dit het gebeur soos hulle geglo het!
Tot 1939 is die opvoerings gehou op 'n verhoog in die kerk se begraafplaas waarna die ouditorium met 4750 sitplekke gebou is. Die opelugverhoog is 45m breed, waarop tot 800 spelers én selfs donkies, honde en duiwe, gelyk kan verskyn. Slegs inwoners, wat in Oberammergau gebore is, of alreeds 20 jaar daar bly, mag aan die passiespele deelneem. Ter voorbereiding, onderneem die spelers 'n pelgrimstog na Israel en word hulle deur 'n Joodse professor onderrig in die omstandighede rondom Jesus en die Nuwe Testament. Die regisseur, Christiaan Stuckl, skep verskillende invalshoeke, waarop die spele baie lewensgetrou vertolk kan word, wat meebring dat kykers se ervaring daarvan verskil. Onteenseglik egter, is dat dit 'n besonderse, intense en persoonlike ervaring is. Mens besef dat, benewens Jesus se geboorte, Paasfees die grootste bewys van God se genade is. Die gemeenskap van Oberammergau het daardie belangrike boodskap tasbaar gemaak. Mag ons elkeen 'n passievolle Christusfees ervaar!
Beriggewer: JCB
Oberammergau ('n lugfoto van die dorpie).
Die ingang van die ouditorium waar die passiespele aangebied word.