Sirkel: Cradock
Tak: Hofmeyr
Portefeulje: Opvoeding & Kultuur
Beriggewer: Teresa Opperman
Datum: 27 Februarie 2012
Marius Whelan, 'n onderwyser wat vir 3 jaar in Korea skoolgehou het, het die Hofmeyr VLV vroue toegespreek. Hy deel mee dat Boeddhisme die belangrikste geloof in Korea is, en dat rys die hoofsaaklike opbrengs is. Rys word op elke stukkie grond wat beskikbaar is verbou - en selfs onder plastiek in die winter.
Besonderse kenmerke van die Koreane wat hy uitgelig het is die feit dat die mense van Korea baie klein van liggaamsbou is, en geen liggaamshare het nie. Die nasie is baie gekultiveerd en netjies, die vroue lyk baie eenders en trek ook dieselfde aan, en almal se haarstyle en kleur stem ooreen. Dit is 'n welvarende gemeenskap. Japan en China is hul gunsteling vakansiebestemming en vir hulle is Afrika die donker kontinent. Koreaanse vroue wil nie kinders baar nie, want dit verniel hul postuur. Filippynse en Japannese vroue word ingevoer as 'comfort women'. Daar bestaan geen individualiteit, almal moet dieselfde wees. Rys is hul basiese voedsel, daar word selfs 'n tipe ryspap voorgesit vir ontbyt.
Die Koreane vier 2 feeste - die Chinese Nuwe Jaar en die Voorvaderfees. Dit is die oudste skoondogter se plig om na die voorvaders om te sien en ook na alle ou mense in die gesin. Die ou mensies in Korea is almal kromgetrek en loop met kieries, terwyl die jong mense ernstig oorgewig is aangesien hulle nie meer aktief werk op die rysvelde nie, en net Westerse ryk kosse wil eet. Loofkool word as groente geëet, dit word ingelê en is regdeur die jaar op die spyskaart. Seekat word ook gedroog en as lekkerny beskou, en in die laatsomer word hondevleis berei om hul kragte op te bou vir die winter wat voorlê.
In Korea lyk elke dorp presies dieselfde, die geboue ook, as jy dus een dorp ken, sal jy nêrens weer verdwaal nie. Alles is eenvormig.
Die Koreane is geweldig gesteld op prestasie in hul skoolopset. Skool is van Maandae tot Saterdae en na skool word daar tot 8 uur saans ekstra buitemuurse klasse aangebied, wat verpligtend is. In hul af tydjies speel die kinders net rekenaarspeletjies - geen kind speel ooit meer buite nie.
Tweedehandse artikels word nie herverbruik in Korea nie - dit word eenvoudig buite gelaat vir iemand wat dit sou nodig hê, en indien nie, word dit eenvoudig tot niet gemaak. Daar is slegs 34 Engelse onderwysers in Korea - en hulle word spesiaal gekeur. 'n Buitelander word soos 'n buitelander behandel - want buitelanders lyk anders. Marius sien Amerika as die eerste wêreld, Korea as die tweede wêreld en Suid Afrika as die derde wêreld.
Hy waarsku voornemende toeriste om nie koffiehuise in Korea te besoek nie - dit is vanwaar die prostitute werk.
Marius Whelan lewer 'n insiggewende praatjie oor sy jare as onderwyser in Korea.
Susan Vermaak en Estelle Kruger tydens Hofmeyr se 'groen' vergadering. Estelle hou die Mary van der Linde trofee vas wat deur wyle Mary van der Linde, wat vir 70 jaar lid van Hofmeyr VLV was, aan die VLV nagelaat is.
Hofmeyr tak het 'n kleurprogram waarvolgens almal genooi word om volgens 'n spesifieke kleur aan te trek vir die vergadering. Die afgelope vergadering was die Groen vergadering. Groot was die verrassing toe Estelle Kruger, sekretaresse, daar opdaag met 'n groen uitrusting wat 50 jaar oud is. Sy het die pakkie by 'n vriendin van haar gekry toe hulle nog op skool was, en voorwaar, Estelle pas nog in die uitrusting. Hoeveel VLV vroue kan daarop roem?
Hofmeyr in groen.