Sirkel: Tygerberg
Tak: Durbanville
Beriggewer: Alet Colyn
Datum: 7 Maart 2012

Tydens Tygerberg se konferensie het Durbanville tak weer puik gepresteer. 

Elna Smit het eerste plek met haar blomme (gevorderd) behaal.

Johanna Steyn het tweede plek behaal.

Die tak het weereens die trofee vir die meeste punte in kompetisies, asook die trofee vir takbetrokkenheid by sirkelprojekte, verower. Ester de Bruyn ontvang die trofee van Marie Louw, voormalige Sirkelpresident.

Portefeulje: Gesondheid

Beriggewer: Marietta van Manen
Datum: 20 September 2011

In die middel van ‘n lang lys name, die geslagsregister van die stam van Juda in 1 Kronieke 4, staan een naam uit: Jabes. Nie oor die naam nie, maar oor wat rondom die naam opgeteken is.

Só lui vers 10: Jabes het die God van Israel aangeroep met die woorde: “Stort u seën oor my uit, vergroot my grondgebied, neem my onder u beskerming en weerhou onheil van my sodat geen smart my tref nie.” God het laat gebeur wat hy gevra het.  

Uit hierdie teksvers kom die naam Huis Jabes, ‘n toevlugsoord vir slagoffers van gesinsgeweld. ‘n Tweede veilige huis is pas in die noordelike voorstede van Kaapstad geopen. Die twee huise wat tans bedryf word, bied ‘n tydelike, veilige heenkome waar omgesien word na vroue en hul kinders. Buiten dat voorsien word in basiese behoeftes soos ‘n dak oor die kop en kos op die tafel, word die vroue gehelp om die trauma te verwerk en ‘n sin vir eiewaarde te herwin. Hulle word ook gehelp om  werk te kry en uiteindelik op hul eie voete te staan.

Huis Jabes ontvang geen subsidie nie en is heeltemal afhanklik van skenkings en geldinsamelingspogings. Die bedryfskoste in hierdie stadium bedra tussen R30 000 en R35 000 per maand, sê mev. Adri  Klindt, stigter. Daar is ook altyd ‘n behoefte aan linne, kombuisware, meubels ens. Huisware wat nie in ‘n onmiddellike behoefte van Huis Jabes voorsien  nie, help met ‘n klein begin in ‘n eie woonplek wanneer vroue ná ‘n paar maande gereed is vir ‘n nuwe, onafhanklike lewe.www.huisjabes.co.za.

Meer inligting oor Huis Jabes is beskikbaar op die webwerf

VLV Durbanville het twee duvetstelle en ‘n aantal donskussings geskenk vir ‘n kamer in die pas geopende tweede veilige huis.  Van links is Ester Conradie, ondervoorsitter, Adri Klindt, stigter van Huis Jabes, en Annette Conradie, voorsitter.

Portefeulje: Opvoeding & Kultuur
Beriggewer: Marietta van Manen

Dit is elke vrou se reg om menswaardig en met respek behandel te word. Só sê mev. Denise Robinson, LP en skaduminister vir vroue, kinders en mense met gestremdhede. Mev. Robinson was die gasspreker by ‘n geleentheid wat deur die VLV Durbanville aangebied is.

Hoewel die Grondwet bepaal dat alle mense gelyk is, is dit egter so dat binne sommige gemeenskappe en kultuurgroepe die vrou steeds ‘n mindere posisie beklee , soveel so dat sy soms weinig beter behandel word as ‘n besitting van die man, het sy gesê, en dan word geweld “aanvaarbaar”. Om so ‘n diepgewortelde persepsie om te keer, is ‘n formidabele taak en dit is nodig dat sowel die man as die vrou opgevoed word met die begrip dat die vrou nie ondergeskik is nie, maar ‘n mens  wat die reg het om binne ‘n veilige omgewing tot haar volle potensiaal te ontwikkel. Die klein begin, het mev.Robinson gesê, is binne die gesin waar seuns van kleinsaf moet leer om hul ma en susters te respekteer en hulle dieselfde geleenthede te gun as wat wat die pa en seuns vir hulself toeëien.

Mev. Robinson het oudpresident Nelson Mandela aangehaal wat gesê het dat ware demokrasie eers kan bestaan wanneer vroue bevry en bemagtig is. Bemagtiging behels onder meer geletterdheid en opleiding, erkenning van potensiaal en die reg van ‘n vrou om besluite te neem oor haar liggaam en leefwyse, het sy gesê. Mev.Robinson beskou dit as ‘n voorreg om haar vir die verwesenliking van die ideal van bevryding en bemagtiging te bewywer.

By die gasspreker, mev. Denise Robinson (voor), is agter, van links, mev. Annette Conradie, voorsitter VLV Durbanville, mev. Caro Ekermans, president Sirkel Tygerberg, en mev. Marie Louw, vorige president Sirkel Tygerberg.

Beriggewer: Marietta van Manen

'n RYkLIK geseënde negentig jaar is wat San Cillié, geliefde lid van VLV Durbanville en vrou van formaat, op Sondag 28 Augustus vier.

San - veels te jonk van gees om formeel as mev. Cillié aangespreek te word - is reeds 65 jaar lojale lid van eers die VLV, toe die VLU en daarna weer die VLV.

As iemand wat van kleinsaf lief was vir kuns en graag iets uit niets geskep het, was die VLV die ideale plek waar sy haar kreatiwiteit kon uitleef. Die jong kleuterskoolonderwyseres sluit op Laingsburg aan by die VLV. Sy maak 'n draai in die Suider-Paarl, waarna sy lid word van die VLU in Pretoria. In 1985 sluit sy aan by die VLV Durbanville.

Deur die VLV het sy baie vriende gmaak en baie geleer, sê San. Die vele trofeë en bekers wat sy oor dekades gewen het, getuig daarvan dat die VLV nie net 'n goeie leerskool is nie, maar lede inspireer om hul talente te ontwikkel.

San is veral bekend vir haar blommekuns, waarmee sy talle bekers verower het. Haar getroue en entoesiastiese deelname aan kompetisies oor 'n wye spektrum, het haar male sonder tal die beker vir die meeste punte algeheel besorg. As bestuurslid oor baie jare het sy 'n stewige bydrae gelewer. Sy het ook uitgeblink by landbouskoue.

San is in 1946 getroud met Gawie, 'n chemiese ingenieur, wat haar in 2002 ontval het. Vanweë sy betrokkenheid by waternavorsing, het hy plaaslik en oorsee baie gereis. Sy was besonder bevoorreg om hom nie minder nie as veertien keer op oorsese reise te kon vergesel, sê San.

Drie kinders, 'n seun en twee dogters (die jongste is op 12 jaar oorlede), is uit die huwelik gebore. San het drie kleinkinders en twee agterkleinkinders.

Hoewel San nie meer aan kompetisies deelneem nie, loop sy selde 'n VLV-byeenkoms mis. Met haar fenomenale algemene kennis, haar belangstelling in mense en gebeure - van algemene nuus tot politiek en sport - is San 'n inspirasie vir almal om haar. VLV Durbanville wens haar goeie gesondheid, vreugde en ryke seën toe.  

Portefeulje: Leefstyl

Beriggewer: Marietta van Manen

'n Teddiebeer kies sy mens. Só sê me. Sue Bossenger wat vytien jaar gelede haar eerste teddie aangeskaf het en al nege jaar lank teddiebere maak. Sy het die kuns by 'n byeenkoms van die VLV Durbanville gedemonstreer.

Elke teddiebeer het 'n eie persoonlikheid, al gebruik jy dieselfde patroon. Elkeen is ewe troetelbaar, en as die gogga eenmaal gebyt het, is jy lewenslank 'n teddie-mens, waarsku sy.

'n Groot verskeidenheid materiaal en kunspels is beskikbaar vir die maak van teddiebere. Dit word gekies om te pas by die grootte en persoonlikheid van die beertjie. Die lyf en ledemate word apart gemaak en gestop en elkeen word afsonderlik met 'n spesiale spitpen geheg. Ogies word aangewerk en gesiggies geborduur.

Me. Bossenger maak nie net teddiebere nie, maar bied ook klasse aan en verskaf al die gereedskap en materiaal wat nodig is, waaronder volledige teddiestelle.
  

Me. Hester Geringer, sameroeper Leefstyl:naaldwerk, het die byeenkoms gereël.

Me. Sue Bossenger demonstreer die maak van teddiebere.

Me. Sue Bossenger en me. Hester Geringer, sameroeper Leefstyl:naaldwerk, met van die troetelbeertjies.

Johanna Steyn het die tweede plek in die blommekompetisie (gevorderd) by die konferensie behaal.

TAGTIG jaar oud vanjaar, maar met genoeg geesdrif om met haar inskrywings die trofee vir die meeste aantal punte voor die neuse van 13 ander takke weg  te raap.

Dít is VLV Durbanville, gasvroutak vir die 44ste konferensie van Sirkel Tygerberg, gehou by Eensgezind op 10 Maart 2011. Daar is hard gewerk om van hierdie dubbele geleentheid iets spesiaals te maak.

Die spogsentrum,  gewild vir troues, was nommerpas vir  vanjaar se kompetisietema: Die bruid. Die swart-en-wit kleurskema was dramaties en stylvol.

Onder die eregaste was mev.Erika Lubbe, president van VLVK, wat ook die trofeë oorhandig het, asook oud-voorsitters van VLV Durbanville.

Die geleentheidspreker, me. Nicky Abdinor, is die verpersoonliking van die VLV-leuse vir 2011: Aanhouer wen/"Never give up". Me. Abdinor, wat gebore is sonder arms en met verkorte bene, is 'n kliniese sielkundige wat haar eie praktyk bedryf. Sy bestuur haar eie motor, aangepas vir haar behoeftes. Sy het haar toespraak toegelig met video's.

Die driegangete was smullekker en prentjiemooi. 'n Pronkveer vir Marina Louw en haar personeel.

Mev. Caro Ekermans, 13 jaar lank sirkelsekretaris, is verkies tot sirkelpresident en neem die leisels oor by mev. Marie Louw wat 12 jaar in dié amp gedien het.



Beriggewer: Marietta van Manen, VLV Durbanville, Sirkel Tygerberg

Kyk net die spoggerige verjaardsdagkoek!
 

Egte Franse sjampanje is gebruik vir die heildronk.

Hester Geringer, pryswenner borduurster van Durbanville tak, hier saam met VLVK President Erika Lubbe en Mariana Rabie, die bemarkingsbestuurder van Agri-Expo en VLV-borg. 

Die bestuur is van links voor Hester Geringer, Ester de Bruyn,  Marlene MacDonald en Marietta van Manen. Agter is Annelien Jonker, Johanna Steyn, Rina du Toit, Esmé van Vuren en Annette Conradie, voorsitter. Naomi Koch was afwesig. Foto: Rita Nightongale.