Murraysburg tak se voorsitter, René Louw, was tydens haar verslagvergadering na die kongres baie beïndruk met die sprekers, wat tydens die kongres te Kimberley opgetree het.  Veral die nuwe rektor van die Universiteit van die Vrystaat, prof. Jonathan Jansen, het vertroue ingeboesem op 'n tydstip waar die onderwysprentjie donker lyk.
 

Tog was dit Sandra Nolte, sirkelpresident van Sirkel Noord-Karoo, wat met haar warm medemenslikheid, humor en sprankel tydens Murraysburg se vergadering die kalklig gesteel het.  Indien enige Murraysburg lid aan die waarde van kompetisies getwyfel het, het Sandra Nolte se entoesiasme alle twyfel summier uit die weg geruim. Sonder dat dit eers vir haar nodig was om lank daaroor te redeneer. Dit is duidelik dat daar gepoog word om weg te doen met outydse, nuttelose en duur artikels, wat geen doel dien nie.  Aandag word aan praktiese en bruikbare artikels geskenk en tokreenwerk leen hom dan by uitstek daartoe om met geringe uitgawes 'n "nuttelose" voorwerp in 'n mooi gebruiksartikel te verander.
 

Haar praktiese wenke en baie voorbeelde, wat sy saamgebring het, het heel party lede se verbeelding en belangstelling geprikkel.  Die verf is by kunswinkels, of by Linda Venter in Bloemfontein, te koop.  Aangesien dit per 500ml verkoop word, is dit sinvol indien 'n paar persone saam koop en dit dan verdeel, omdat die verf gou hard word wanneer dit aan lig en lug blootgestel word. Daar moet altyd met dun handskoene gewerk word en enige kwas is geskik. Wanneer artikels van glas of plastiek gebruik word, moet die oppervlakte met byvoorbeeld kombuislappies bedek word, aangesien die verf nie maklik aan die glas en plastiek "klou" nie. By die versiering van artikels kan vrye teuels aan die verbeelding en kreatiwiteit gegee word. Selfs 'n mooi blom kan blaartjie vir blaartjie geverf word om 'n doodgewone artikel in iets spesiaals verander.  Om 'n eentonige, doodse eindproduk op te kikker kan 'n klein bietjie koper, brons, silwer of goue verf hier en daar effentjies oor die artikel geverf word, voordat 'n lagie vernis die produk afrond.
 

Alle Murraysburgers het Sandra Nolte se besoek en demonstrasie baie geniet en waardeer en hoop om haar binnekort weer as gas te ontvang.
 
 
Berig deur Mette Kromhout.

Sandra Nolte demonstreer Tokreen terwyl Tannie Minnie aandagtig luister.

Tydens Murraysburg se Julie vergadering het Elsabé Louwrens die lede ‘n bietjie oor die leefstyl in Tanzanië ingelig.

Dit was vir hulle besonder verrykend om ander Afrika-mense te kon leer ken, omdat hulle oogkontak maak en vreemdelinge baie hartlik welkom laat voel.  Goeie menseverhoudings is vir die mense van Tanzanië baie belangrik. Die openheid en warmte van die mense laat die besoeker nie net welkom nie, maar ook veilig voel!

Op die platteland woon die mense langs die strate, omdat dit vir die staat makliker is om daar dienste te verskaf.  Die huise is meestal eenvoudig, maar die vroue trek besonder goed aan en hulle lang rokke en rompe is van die mooiste Afrika-materiale gemaak, terwyl die dogtertjies in pragtige partytjie rokkies uitgedos is.

Die Tanzaniërs is hardwerkend en steur hulle min aan vasgestelde werksure.  Hulle begin baie vroeg soggens, aanvaar as vanselfsprekend dat werk deel van die mens se bestaan is en maak mooi meubels sommer daar langs die pad, waar dit ook verkoop word. Hulle meubels en planke word by hul werksplek en nie agter heinings en slotte geberg nie.

Alle benodigdhede word met waentjies of fietse vervoer.  Die waentjies word nie deur diere nie, maar deur mense getrek en ‘n mens sien ‘n hele familie op een fiets of sakke houtskool agter op die drarak en/of stuurstang gebalanseer.  Brandstof is baie duurder as in Suid-Afrika.

Vars produkte soos groente en vrugte is vrylik en billik langs die paaie te koop en van goeie gehalte. Selfs brood kan omtrent orals bekom word. Die plaaslike koffie is baie lekker en ‘n tipiese ontbyt bestaan uit speserytee en gesmeerde witbrood. Alles is baie goedkoper as in Suid-Afrika.

Die geselskap het hulle toegespits op die Christene van die Masai-stam in die omgewing van die Ngorongoro krater.  André Louwrens het by twee geleenthede gepreek en is diep geraak deur die sang van tipiese Masai wysies, wat herskryf is om die liefde van Jesus te besing, en aangrypende oomblikke van intense liefde.  Hulle het ervaar dat God in Afrika toegankliker is danksy die teenwoordigheid van ongeskonde ekologiese sisteme en die afwesigheid van menslike arrogansie.

Mette Kromhout

Tydens Murraysburg se Junie vergadering is die lede deur Maretta Theron aangespoor om deur die regte kanale beswaar aan te teken wanneer diens nie na wense is nie, aangesien dit die enigste manier is om dienslewering in ons land te laat verbeter.

 
Die gasspreker, Alna Theron, het die dames oor slaapapnee ingelig. Hierdie toestand is onlangs by twee persone in die klein Murraysburg gemeenskap gediagnoseer.

 
Slaapapnee vind plaas wanneer weefsel en spiere in die lugweg platval en die lugvloei na die longe belemmer word. Die brein waarsku die pasiënt dat suurstofvlakke daal deur hom kort-kort wakker te maak. So ‘n persoon kry nie voldoende rus nie, is kronies moeg en dié toestand kan aanleiding tot ernstige siektes soos, diabetes, hartaanvalle, nierskade, beroerte en depressie gee.  Die lyer hou verskeie kere per nag vir 10 sekondes tot so lank as twee minute op met asemhaal en dit kan die dood tot gevolg hê.

 
Indien die moontlikheid van slaapapnee bestaan, behoort die betrokkene ‘n Polysomnogramtoets in ‘n slaapkliniek te ondergaan. Sou slaapapnee wel gediagnoseer word, is die CPAP masjien die enigste oplossing.  CPAP is die afkorting vir “ Continuous Positiv Airway Pressure”.  Dit beteken dat atmosferiese lug teen ‘n vasgestelde druk deur die lugweg gestuur word,  wat verseker dat die lugweg 100% oop is. Die masjien word saam met ‘n neusmasker gebruik en die pasiënt sal al vyf slaapfases beleef,  afgesien daarvan dat die snorkery iets van die verlede sal wees.  Dit is vir die algemene gesondheidstoestand baie belangrik dat al vyf fases van slaap ervaar word. Die lede het hierdie inligting baie interessant gevind.

 
Berig deur Mette Kromhout

Tydens die Openbare Sake vergadering van 12 Mei het Maretta Theron verskeie aktuele sake wat onder die portefeulje ressorteer aangeraak.  Die lede het hulle so vêr moontlik met uitrustings, wat hulle ondersteuning van die sokkerskouspel weerspieël, uitgedos ten einde eenheid en nasiebou in ons land te bevorder.

 
Adrie Conradie, die hoofspreekster, het uit eie ondervinding hulle gesin se emosies en ervaringe rakende ‘n kind wat oorsee woon en werk met die gehoor gedeel.  Nadat hy met ‘n Franse meisie getroud is, het hulle seun Jaco uit eie keuse besluit om in Frankryk te gaan werk soek.  Aangesien die beheersing van die taal ‘n voorvereiste was om ‘n goeie,  permanente betrekking te kon bekom, moes hy noodgedwonge eers allerhande los werkies doen terwyl hy taalkursusse gevolg het.  Omdat hy doelgerig was, het hy vinnig gevorder en ‘n werk as ingenieur in die bootbou-industrie bekom.  Hy het gou gevind dat die wêreld in Europa vir die gewillige en toegewyde werker oop is.
 

Die harde werklikheid het eers tot Adrie en Flippie  deurgedring toe hulle besef het dat dit nie slegs ‘n tydelike skeiding is nie.  Hulle was bly oor die geleenthede en uitdagings wat hulle seun gekry het. Juis daarom poog hulle om vir Jaco so vêr moontlik te ondersteun.  Hulle praat dikwels met mekaar en het geleer om baie sensitief vir hulle kind se gemoedstoestand te wees.  Hy word aangemoedig om oor sy lewe, vreugdes en probleme in Frankryk te praat. Wedersydse gereelde besoeke help hulle ook om deel van mekaar se lewens te bly.
 

Gelukkig het Jaco gou ‘n goeie vriendekring, wat baie aangename en interessante dinge saam doen, opgebou .  Die lewe en werk in Frankryk is vol uitdagings, maar hy is gelukkig in sy werk, al bly die gemis aan die familie en eie godsdiens en tradisies nie agterweë nie.  Adrie en Flippie probeer hom altyd positief en met die nodige humor motiveer en hulle sê so dikwels moontlik vir mekaar hoeveel hulle vir mekaar omgee en mekaar waardeer.  Al is dit vir ouers bitter moeilik wanneer hulle kinders so ver elders woon en werk, maak ‘n ouer daarmee vrede solank dit tot die kind se voordeel strek.
 

Margaret Booyse, wat op Kareebosch woon en werk, is lid van die forum wat hom vir plaasveiligheid beveilig en sy het die vergadering kortliks oor hulle aktiwiteite ingelig en kon hulle meedeel dat die forum en sy lede danksy hulle waaksaamheid en oplettendheid beslis ‘n verskil, in die omgewing waar hulle aktief is, maak
 

Nadat Mette Kromhout uit eie ondervinding vertel het hoe tevrede sy met die Bio-wasbal is, nie net weens die koste-effektiwiteit nie, maar veral omdat dit ook omgewingsvriendelik is, het die lede aan ‘n vasvra oor verkeersreëls deelgeneem en besef hoeveel leemtes daar in hulle kennis is, ten spyte van jare se bestuur. Daarmee het nog ‘n leersame en interessante vergadering ten einde gekom.
 
Beriggewer: Mette Kromhout
 

Murraysburg se Aprilvergadering was 'n potpourri-vergadering in die ware sin van die woord. Adjudant-offisier Seadrust van die plaaslike polisie het gesels oor landelike beveiliging en deel sinvolle wenke ten einde misdaad te voorkom en teë te werk met die teenwoordiges.  Sy verskaf belangrike telefoonnommers en vertel van die projekte, wat die polisie aanpak, om die landelike misdaadprobleem hok te slaan.

Wilna Pienaar moedig die lede aan om kreatief te dink en ou goed, wat êrens weggebêre is, op te diep en vir iets nuuts te gebruik.  So kan ou kantgordyne gebruik word om lampskerms te maak. Sy wys dan ook pragtige kussings, gemaak van sogenaamde weggooigoed.  Sy moedig die lede aan om van hulle ou erfstukke na die volgende vergadering te bring en die storie met almal te deel.

Trourokke van nege van die lede en hulle kinders en kleinkinders is vertoon terwyl Hermien Botha die troumars gespeel het. Baie spesiaal was die rokke van Dorees Pienaar en haar kleindogter, wat onlangs getroud is.  Al verander die modes, bly 'n mooi trourok pragtig!

Hannelize van Heerden se sokkervasvra was natuurlik heel gepas en het van die dames besef dat hulle kennis van sokker, veral van die reëls van die spel, binne die volgende weke beslis nog opgeknap moet word, indien ons wil deel wees van die Wêreldbekertoernooi, wat ons land aanbied.

Voordat daar heerlik tee gedrink en gekuier is, het Nonsie Hattingh die dames daaraan herinner dat die Karoowinters, net soos die somerson, baie skade aan die vel kan aanrig. Haar praatjie oor velsorg en die produkte van Justine, was dan ook baie interessant en 'n goeie afsluiting vir 'n prettige en interessante vergadering.

Aangesien die VLV ‘n verskil in die gemeenskap wil maak, was Alida Vermeulen, sekretaresse van die plaaslike Toerismevereniging die spreker by die Maart vergadering.  Sy het saam met dr. Johan Loock, bekende geoloog verbonde aan die Universiteit van die Vrystaat, die distrik drie keer deurkruis ten einde verskillende toerisme roetes te kan saamstel.

Afgesien van ‘n roete, wat die geskiedenis van die distrik van 1730 tot vandag dek, is daar ’n hele roete met die Anglo-Boereoorlog as tema aangesien verskeie skermutselings rondom Murraysburg plaasgevind het en die internasionaal bekende boerehelde, Wynand Malan en Gideon Scheepers, diep spore in die distrik getrap het.  Verder vertel die grafte en begraafplase in die distrik hulle eie verhaal.

Dis ook interessant om die spore van ander volke en diere, wat vroeër in die distrik gewoon het, te volg. Name van klowe, plase, riviere en berge soos byvoorbeeld Tierkloof, Leeufontein en die Buffelsrivier bevestig dat hierdie diere algemeen hier voorgekom het. Vermeulen en Loock het ook die spore van avonturiers en ontdekkers gevolg en verskeie boeke en dokumente bevestig hulle bevindinge.

Ou opstalle en plaaswerwe werp lig op hoe ons voorouers geleef het, terwyl van die Boesmantekeninge, wat op verskeie plase aangetref word, heelwat oor die Boesmans   geleer kan word.  As dan nog in ag geneem word dat ou skuurklippe, fossiele, lawa en prehniet hulle eie verhaal vertel, is dit duidelik dat Murraysburg beslis veel het om aan die toeris te bied.

Mette Kromhout

Leona Pienaar, gasspreker tydens Murraysburg se eerste vergadering van die jaar , het verskeie soorte kameras gewys. Alhoewel die digitale kameras fotografie vir die leek baie vergemaklik het, word die beste professionele foto’s nog steeds geneem met kameras wat film gebruik. Dit is natuurlik tensy ‘n mens die heel nuutste en duurste digitale kameras kan bekostig.  Die voordele van die digitale kamera is legio.  Wanneer dit op outomaties gestel is, hoef jy jou oor niks te bekommer nie. Vir die neem van kunsfoto’s behoort ‘n mens egter van die kamera se verskillende hulpfunksies gebruik te maak.

 
Sy het ‘n paar praktiese wenke vir die amateur fotograaf gegee.  Die horison behoort óf in die boonste derde van die foto te wees, indien die voorgrond dit regverdig, óf in die onderste derde van die foto, as daar ‘n besondere agtergrond is. Die fokuspunt moet nooit in die middel van die foto wees nie. Die foto sal meer treffend vertoon indien dit na die kant geskuif word.   Dit is goed om af te buk tot op dieselfde hoogte as dié van die objek,  bv. ‘n kind, aangesien die kind se kop andersins in verhouding met sy lyf té groot sal wees. Dit is beter om so na as moontlik aan jou objek te kom, eerder as om van die zoom-funksie gebruik te maak. Die beste tyd vir die neem van foto’s is vroegoggend of in die laat namiddag. Groepfoto’s behoort nooit met ‘n wit muur as agtergrond geneem te word nie. Dit is beter om jou foto’s eerder in natuurlike sonlig te neem as om van die flits gebruik te maak.

 
Leona het met behulp van haar skootrekenaar en die program Photoshop vir die lede gewys hoe foto’s na willekeur gemanipuleer kan word.  Selfs die diepste plooie kan met ‘n bietjie geduld weggetoor kan word.  Die vetrolletjies is egter moeiliker om te laat verdwyn!  Sy het verskeie dames geïnspireer om met Photoshop te eksperimenteer. Na dese behoort Murraysburg se dames uitstekende fotograwe te wees.

 
Wilna Pienaar, sameroepster van Kuns & Handvlyt, het prakties bewys dat ‘n mens met ‘n bietjie  moeite en baie kreatiwiteit die oulikste geskenke vir Valentynsdag kan maak. Dit is glad nie nodig om baie geld uit te gee om duur geskenke te koop nie. Minder is beslis meer, aldus Mette Kromhout, wat die bydrae uit Murraysburg gestuur het.

 Wilma Pienaar

Verskeie lede het onmiddellik gereageer nadat hulle tydens die vorige vergadering deur die Inrigtingshoof van Huis Spitskop ingelig is oor spesifieke behoeftes van die inwoners aldaar.  Die Inrigtingshoof het ‘n bedankingsbrief aan VLV gestuur vir die kniekomberse, warm klere, onderklere ens., wat deur lede geskenk is en wat ‘n daadwerklike verskil in die lewens van baie van die inwoners maak.

Tydens die Julie vergadering, wat op 29 Julie gehou is, kon die bestuur ook die lede bedank vir hulle bydraes tot die omgeepakkies vir die Van der Merwe en Möller gesinne, wat onlangs kinders aan die dood moes afstaan.  Hierdeur poog VLV Murraysburg om meelewing te betuig.  Kay Dalgety het ook 21 kindertruitjies, wat deur lede gebrei is, aan mev. Snijders, hoof van die kleuterskool van die Combat-Educare program, oorhandig.  Tydens haar bedanking het mev. Snijders gemeld dat die geld ingesamel deur verkope van die truitjies wat verlede jaar geskenk is, vir hulle van onskatbare waarde was.  Danksy die goeie samewerking van haar personeel gaan dit goed by die skool en kom die Minister, onder wie die kleuterskole resorteer, binnekort homself van die goeie bestuur en diens vergewis. Die kinders ontvang nie net maaltye en geleentheid om te speel nie, maar daar word ook ‘n spesifieke onderrigprogram gevolg.  Die dames is dankbaar vir hierdie geleentheid om iets vir die plaaslike kinders te kan beteken.

Die Julie program, met winter as tema, is deur vier bestuurslede aangebied.  Maryn de Klerk het entoesiasties gesels oor die terapeutiese waarde van verandering en vernuwing binne die huis en haar praatjie met mooi illustrasies toegelig.  Veral teen die einde van ‘n lang en koue winter doen dit elke vrou die wêreld se goed om ‘n bietjie krities na haar leefwêreld te kyk.  Daar is hoofsaaklik vier binneversieringstyle en die meeste vroue kan met een van hulle identifiseer. Soos sy naam aandui, is daar teenstrydighede in die moderne romantiese styl met wit as die oorheersende kleur, natuurlike teksture soos hout, sagte materiale en kandelare.  Die teenstrydige elemente vul mekaar egter aan.  Die kontemporêre stedeling steur haar min aan vaste reëls.  Sy hou van klassieke meubels uit die twintiger jare van die vorige eeu, neutrale kleure met hier en daar ‘n spatsel kleur, skoon, natuurlike lyne en natuurlik baie glas en chroom.  Die belangrikste is dat elke item funksioneel moet wees.  Die kunssinniges volg natuurlik die Boheemse styl na en steur hulle min aan lyn en balans. Sagte meubels, fraaiings en baie satyn en fluweel geniet by hulle voorkeur, terwyl die gesellige gesinsmens ‘n ontspanne styl met oorwegend aardse kleure, afgewissel met ‘n bietjie helder, energieke kleur, verkies.  In ‘n huis met klein kinders en troeteldiere is houtvloere en wasbare materiale gepas.  

Maretta Theron het gedemonstreer hoe net die gebruik van ‘n bietjie kleur en verbeelding die vaal winterhuis warmte en nuwe lewe kan gee.  Heel gepas het sy afgesluit met die lees van twee sonnette van N.P. van Wyk Louw, Winter en Eerste Sneeu.  Die waarheid van Van Wyk se woorde “ dat alle rus die lewe dien”, is weereens besef.

Die pragtige uitstalling van maniere om jou tuin, juis in die winter, voëlvriendelik te maak deur Elana Grobler, het die algemene belangstelling geprikkel.  Sy het ook interessante resepte vir lekkernye om voëls na jou tuin te lok, beskikbaar gestel.  Anders as wat ‘n mens sou verwag, moet suiker en voedselkleursel vermy word by die beplanning van lekkernye vir voëls.

Dit was weereens opvallend hoeveel moeite bestuurslede doen om hulle vergaderings interessant te maak en al sê hulle dit nie altyd nie, waardeer die lede dit.  Dis sekerlik dan ook die hoofrede waarom Murraysburg se VLV vergaderings so gewild is … afgesien natuurlik van die heerlike tee, versnaperinge en saamkuier na die tyd!

Mette Kromhout

Mnr. Etienne Terblanche, inrigtingshoof van Huis Spitskop, was die gasspreker en het die een en ander oor die tehuis met die lede gedeel.  Aangesien baie van die teenwoordiges, sowel as hulle ouers, amper dertig jaar gelede alles in die stryd gewerp het om hierdie inrigting tot stand te bring en die gebou op te rig en steeds op verskeie maniere die inrigting ondersteun, is gereelde inligting oor die wel en wee van Huis Spitskop belangrik.

Danksy goeie bemarking en die diens wat gelewer word, is daar op die oomblik vyftig inwoners.  Dit sluit die inwoners in die drie buitewoonstelle in.  Die afgelope twee jaar was vir die inrigting baie moeilik weens 'n gebrek aan fondse, maar nou dat die tehuis vol beset is, gaan dit makliker om die boeke te laat klop en kan daar danksy die lotto toewysing, wat ontvang is, selfs aandag aan broodnodige instandhoudingswerk gegee word.

Op die oomblik is die grootste probleem die eensaamheid van baie van die inwoners.  Veral in die verswakte afdeling is baie persone wat nooit enige besoek ontvang nie en wie se dae vaal en eentonig is.  Mnr. Terblanche doen 'n beroep op die dames om daaraan te dink om 'n inwoner "aan te neem", af en toe te besoek en 'n bietjie te bederf.  Koekies en beskuit is veral nou in die winter ideale geskenkies.  Daar is ook 'n groot behoefte aan warmwatersakke, slaapsokkies, onderklere en kniekomberse.  Hy bedank die VLV vir die vereniging se volgehoue betrokkenheid by Huis Spitskop.  Nie minder as sewe VLV lede dien in die Beheerraad van die tehuis, wat nie meer net 'n ouetehuis is nie, maar ook 'n veilige hawe vir verswaktes en gestremdes vanuit die hele gemeenskap.

Die lede word aangemoedig om kopergeld in 'n leë koeldrankblikkie te versamel.  Hierdie geld sal gedeeltelik aan die "Gentle Care" projek van Britstown geskenk word en verder vir verdienstelike sake in die eie gemeenskap aangewend word.  Maretta Theron sal die lede se "omgeepakkies" vir die Van der Merwe gesin en die gesin van Chanté Hinds, wat op tragiese wyse kinders aan die dood afgestaan het, versorg.

Vanjaar is 17 truie deur lede vir die Combat Kleuterskool gebrei en Kay Dalgety, die nuwe sameroeper vir Openbare Sake, wat ook die Junieprogram aangebied het, sal dit aan die hoof van die skool besorg.

Die vergadering word met 'n heerlike tee, gereël deur Liz van der Merwe ter viering van Kay Dalgety se sewentigste verjaarsdag, afgesluit.



Kay Dalgety oorhandig truitjies aan me. Snijders, hoof van die Combat Kleuterskool