Portefeulje: Opvoeding & Kultuur

‘n Ma is God se liefde in aksie – Anoniem

Moedersdag was die tema vir Niekerkshoop se mees onlangse vergadering.

Mev. Michelle van Zyl het die vergadering kom vertel wat die werk van ‘n grafiese ontwerper behels.
 

‘n ‘Tuistoets’ is gedoen om te bepaal of lede linker- of regterbrein dominant is. Linkerbrein oorheersend beteken dat jy baie analities is, waar die regterbrein dominante meer kreatief is. Dit hang af van die persoon se bui en ook die gemoedstoestand.

Lede is in groepe verdeel en woorde is aan elke groep uitgedeel. Groepe moes ‘n ‘logo’ ontwerp, ‘n naam van ‘n besigheid en ook ‘n slagspreuk wat die winkel beskryf. 

Baie van die lede het gesukkel om die konsep van die woord te ontrafel en daarmee te speel om ‘n opvallende naam te maak. Lede was verras om te sien wat jy als met die 3 woorde kan doen. Selfs die slagspreuke het sag op die oor geval en het lagspiere geprikkel.

Beriggewer:  Liezel Botha

‘n Lid wat pas ouma geword het, Ronél van Biljon, het vir haar kleinseun ‘n kwilt gemaak om hom te verwelkom.

Die vordering met kniekombersies is getoon.

Mev. Hettie Carstens wys die aardse kleure waarin sy  vir haar toekomstige kleinkind ‘n kombersie hekel.

Die tema van vergadering was Moedersdag.

Niekerkshoop het ‘n heerlike dag vol verrassings gehad met die Maart vergadering. 

Een van die lede, mev. Tiena Escot-Watson, verkoop handgemaakte kaartjies wat die asems laat wegslaan.  Die lede het gevra dat sy moet demonstreer hoe sy dit doen. 

Die prente word vanaf ‘n CD gedruk op laser papier en met die hand uitgeknip.  Daarna volg die opmekaar en bymekaar sit van die agtergrond, prent, lint ens.  Die woorde word ook uitgedruk en uitgeknip aangesien Afrikaanse woorde en sê-goed baie skaars is.

Liezel Botha het daarna oorgeneem en die lede het elkeen ‘n sjabloon gekry van ‘n prent.  Lede moes die prent met Iris vouwerk versier.  Party lede het gewonder wat hul doen… Die verrassing was groot toe die sjabloon uiteindelik afgehaal kan word.  Die lede kan met dié tegniek baie van hul oorskiet papier herwin.

Beriggewer: Liezl Botha

Februarie maand word gereken as die maand van liefde.  In Niekerkshoop se VLV was die atmosfeer nie veel anders nie.  Daar was oral tekens van liefde – hartjie sjokolade, kersies, pienk wyn, rooi tafeldoeke.

Hooikoors, ‘n seisoenale allergie,  en die behandeling daarvan is bespreek. ‘n Vinnige oplossing blyk die gebruik van kortisoon te wees.  Andersins kan antihistamine gebruik word vir die verligting van die loopneus, tranerige oë en soms ‘n genies. 

Vroue bo 50 moet jaarliks gaan vir deeglike mediese ondersoek wat insluit – papsmere, mammogram, cholesterol, diabetes ens. om vroeë opsporing van enige onreëlmatige selle waar te neem.

Persone met lae immuniteitsvlakke moet gaan vir griepinspuitings  Griep veroorsaak tussen 200 000 – 500 000 sterftes jaarliks.  Kinders kan ook die inspuiting kry.  Groot welslae is behaal met die inenting.

Liezel Botha het gedigte uit die pen van Hans du Plessis se Innie skylte vannie Jirre voorgelees.  Dit handel oor die Griekwapsalms en teksverse uit die Bybel soos gesien deur die Griekwas.  Musiek van die Griekwapsalms, wat gekomponeer en gesing is deur Randal Wicomb, is gespeel. 

Beriggewer: Liezel Botha

Liezel Botha het nuus gestuur uit Niekerkshoop.

Gedurende die koue dae het die dames van Niekerkshoop se VLV sop en toebroodjies by die plaaslike skole (Primêre skool Môreson, en Kleuterskool) gaan bedien.

Die kindertjies het met kondensmelkblikkies, margarienhouertjies en bekers hul sop kom haal. Die vingertjies het gebrand maar daarvoor is die onderste dele van die truitjies ingespan. Toebroodjies het vinnig verdwyn tussen die grypende handjies.

Sommige van die leerders het die lede wat in Niekerkshoop woonagtig is, gevra wanneer hul weer sop en brood gaan verskaf. Die lede se hartsnare was so geroer dat daar tydens vergadering voorgestel is dat dit ‘n jaarlikse instelling word.

Me. Carin Coetzee het die vergadering daarna meegedeel dat molestering al hoe meer openbaar gemaak word.  Molestering vind 85 % binne die familiekring plaas en 15 % binne die vriendekring.  90 % van die molesteerders is aan die slagoffers bekend. 

Me Coetzee het dele uit biografieë en outobiografieë aangehaal van hoe die slagoffer die molestering ervaar.  Die meeste van die tyd voel die slagoffer dat dit sy/haar skuld is en dat hul gesoek het daarvoor. In Lev 18: 6 – 18 word daar ook melding gemaak van bloedskande. Die slagoffers word meestal ook molesteerders. Die gebeurtenisse het ‘n groot invloed op hul siel, denke en liggaam – ongeag die ouderdom.

Die lede het baie van die inligting verdwaas ontvang en met ‘n oper gemoed die strate van Niekerkshoop ingegaan.

Lente vergadering

Die lede het met ‘n lied in hul harte die vergadering bygewoon omdat die lente met volle bors begin het.  Oral is blommetjies en bytjies sigbaar en die dae is nie meer so grou.

Na ‘n lang bestuursvergadering en met hope idees wat die vergadering vul, is daar begin.  Mev. Gerber het interessante stukkie gelees oor ‘Vandag se gebed’.

Na al die sake van die VLVK afgehandel is, is daar besluit om ‘n bietjie litte los te maak met die speletjie ‘musical chairs’.  Mev. Hettie Carstens en ons jongste lid, PJ Smit (± 3jr) het hande geklap en gesing terwyl die ander lede in die rondte om jaag vir ‘n stoel ten einde ‘n plekkie te verseker.  Na ‘n paar rondtes het die jonges gewys wie’s baas.  Ronelda Smit (6 jr) was een van die semifinaliste.

Die kampioen het ‘n geskenkie gekry en die lag het almal laat ontspan.

Mev. Tiena Escott-Watson het vertel van die “drama” om ‘n visum te kry om oorsee te gaan werk.  Hoe om huis te koop, waar om wat uit te vind en wat om nie te dra of te sê nie.  Die inligting het almal laat wens om oorsee te kan gaan en al die ondervindinge te kan opdoen.

Liezel Botha het nuus gestuur oor Niekerkshoop tak, wat  weereens ‘n handwerk dag gehad het. 

Al die lede wat kon,  het gery na DB en Lizmarie Lubbe se plaas ± 45 km uit Prieska.  Lizmarie het ons kom vertel van die handwerkies wat sy doen om hul huis ‘n  bietjie op die vrolik – sonder om ‘n hoop geld te spandeer.

Lede moes benodigdhede neem om ‘n hartjie te maak. Enige afval stukkie lap, grootoog naald, skêr, gare (dik/dun) ens. moes diegene bring wat het.

Elkeen het ‘n plekkie in die sonnetjie gekies en begin knip, werk en versier.  Die uiteinde was ‘n gesellige klompie vroue wat hul bes gedoen het om haar idee van ‘n hartjie voort te bring.

Liezel Botha (onder leiding van Christel Steenkamp) het nuus gestuur oor Niekerkshoop tak, wat die jaar afgeskop het met 'n modedag. Die modedag is gereël deur die sameroeper van Leefstyl, Ronél van Biljon, en haar helpers.

Lede is in groepe verdeel en elke groep het 'n ontwerpopdrag en koerante ontvang.  In 'n opgewekte atmosfeer het dames geskaterlag terwyl die ontwerpers hul modelle in koerant-uitrustings getooi het.

Ronél, geklee as Hannon Botma,  het die uitrustings met 'n skerp humoristiese aanslag beoordeel en in (wat net beskryf kan word as) egte "Glam Guru" -styl.  Style en uitrustings het groot pret verskaf en Niekerkshoop se "Glam Guru" het dit geïdentifiseer as: drag vir die 2010 parlementsopening,  die amptelike opening van die 2010 Wêreldbeker Sokker,  aanddrag en 'n spesiale uitrusting vir Mev. Zuma VII.

Volgens die voorsitter van Niekerkshoop tak,  Vonesse Gerber, beloof 2010 om 'n besondere VLV-jaar vir dié tak te wees.  Hul beplan vele interessante byeenkomste vir die res van die jaar.