Sirkel:  Paarl
Tak: Slot van die Paarl
Portefeulje:  Gesondheid
Beriggewer:  Annalise Loubser
Datum: 8 Mei 2012

Dr Spinnie Benade het baie interessante inligting oor voeding en gesondheid gegee; party ou goed wat ons net weer moes hoor! Verbeter jou gesondheid deur 5 porsies groente en vrugte te eet per dag. Die helfte van die bord moet gevul wees met groente. Wees meer aktief en eet kleiner porsies.

Eiers is ook nou weer as gesond verklaar, asook donker sjokolade en rooiwyn – dit laat party dames glimlag! ‘n Goeie aanvulling met omega 3 (oppas vir te veel omega 6-olie), vit A en E word hoog aanbeveel.

Hoe eet ons gesonder?
-Verminder die energiedigtheid van die dieet.
-Verminder die vetinname en eet kleiner porsies.

In KZN word ‘n model nou al 10 jaar toegepas waar ‘n huis in ‘n gemeenskap gekies word waar die vroue bymekaar kom, voorligting kry i.v.m. tuinmaak en gesondheid. Dit is ‘n sosiale geleentheid waartydens daar kos gemaak word en inligting gedeel word. Die babas word ook geweeg. Daar word patat, botterskorsie, spinasie, asook wortels geplant.  Dit help die gemeenskap om meer selfversorgend te wees.

‘n Muffin-projek word by Kylemore, Franschhoek bedryf asook Carotino en rooipalmvet koekie-projek in samewerking met Pioneer – dit word versprei onder skole waar die kinders nie genoegsame gebalanseerde kos kry nie.

Vetsug gee aanleiding tot siektes soos ook ondervoeding. Baie siektes het hul oorsprong in inflammasie.

Die troos hierna het gelê daarin dat ons wel ons vergadering mag afsluit met tee en verleidelike verversings, maar die oortreding moet nie so dikwels geskied nie! Thea Basson, die gasvrou, het aan elkeen ‘n Parcel-plantjie (kombinasie van pietersielie en seldery) gegee om te gaan plant by hul huise.

Na die vergadering is daar ook fluks gewerk  aan die ‘slaapsak’-projek wat versprei gaan word deur Badisa onder die mense wat so buite in die wind en weer slaap.

Dames werk fluks aan die slaapsak van plastiek en koerantpapier met die voorsitter, Bokka Wagenaar, voor links.

Thea Basson, Jackie Genis en Bokka Wagenaar.

‘n Voltooide kombers met nog blokke wat verwerk moet word – Armoede-projek.

Sirkel: Paarl
Tak: Slot van die Paarl

Portefeulje: Opvoeding en Kultuur

Beriggewer:  Annalise Loubser

Datum: 8 Maart 2012

Die vroue van Drakenstein het vir die eerste keer die geleentheid saam gevier op die Bergrivierbrug tussen Wellington en Paarl. Die atmosfeer was gesellig. Die Burgermeester, Adv Gesie Lategan, het die vroue toegespreek en gevra dat ons sterk moet staan in ons huise met dissipline en ondersteuning, asook in ons gemeenskappe .Die vroue beskik oor ‘n krag om mekaar te help, want brugbou is baie belangrik, veral nou. Geestelike groei lê ook in die bou van brûe en grense oorsteek en dit is wat vandag hier gebeur. Dit sal goed gaan in die Vallei as die moeders saam staan en ‘n verskil maak!

Thea Basson (regs) bou voort op die verhoudinge met die Kuhla Development dames.

Slot van die Paarl lede Susie Spies, Thea Basson en Annalise Loubser saam met Wellington lid Marieta Serdyn (naasregs) bou saam brûe.

 Sirkel: Paarl

Tak: Slot van die Paarl

Portefeulje: Landbou en Tuinbou

Beriggewer:  Annalise Loubser

Datum: 6 Maart 2012

Die dames van Slot van die Paarl sal nog lank herkou(-drink) aan die oggend by Boland Kelder waar een van ons eie VLV seuns, Jaco Engelbrecht, ons hartlik ontvang het. Jaco se eie woorde “Ek hou van my werk” was duidelik hoorbaar in sy inligtingspraatjie oor die maak van wyn.

Jan van Riebeeck het vanaf 1655 wingerd aangeplant in die Kaap. In die Bybel word dit al genoem van 3 eeue voor Christus. Die wynbedryf in die Wes-Kaap alleen verskaf werk aan amper 160 000 mense. Dit sluit plaasarbeiders, toerisme, advertensie ensovoorts in.

‘n Jaartydperk in ‘n wingerd kan opgesom word in die volgende stappe:
l. September – wingerde bot.
2. Oktober – wingerde blom.
3. November – vrugset.
4. Desember – deurslaan.
5. Januarie tot April – oes van die druiwe.
6. Winter breek aan – blaarval.
7. Rusperiode – dormansie.

Elke dame het ‘n bottel Flutterby Rosé as geskenk ontvang, gebottel in ‘n plastiekbottel. Die voordele hieraan verbonde is dat dit ligter as glas is, dit is ‘n kleiner bottel (plastiek is dunner as glas), dit is ook veiliger om by buite aktiwiteite te gebruik en bowenal is dit omgewingsvriendelik en herwinbaar.

Annalise Loubser kyk hoe die druiwe afgelaai word.

Fia la Grange deel 'n VLV-oomblik met die spreker, Jaco Engelbrecht.

Die komitee by die spreker, Marie Basson, Frouwien du Toit, Fia la Grange en Maria Kirsten.

Annemarie Taljaard ('n nuwe lid), Alice Swanepoel(sekretaris) en Ilze Engelbrecht (die beoordelaar van die kompetisies).

Sirkel: Paarl
Tak: Slot van die Paarl
Studierigting: Opvoeding en Kultuur
Beriggewer: Annalise Loubser
Datum: 7 Februarie 2012

Slot van die Paarl se dames het met verwondering geluister na Daleen Labuschagne van Khula Development Group.

Dit is ‘n gemeenskapsbaseerde program in die Paarl, met die visie om deurlopende ondersteuning te verleen aan buite-skool kinders/jeug asook hul families. Die ondersteuning is op emosionele, sosiale, geestelike en opvoedkundige vlak. Met entoesiasme is die Khula-span besig met die opbou van verhoudings (dit vat tyd!) met hierdie ‘straatkinders’, wat tot gevolg het dat hulle terugkeer skool toe. Die skoolhoofde luister met respek na hierdie vroue wat reeds ‘n pad geloop het met ‘n kind en nou die versoek bring dat die kind weer toegelaat word in die skool. Eerlikheid speel ‘n groot rol, want daar word reguit gepraat oor Tik en dagga.

Die span het gou besef dat hulle die moeders (en ouma’s, want baie kinders word deur die ouma grootgemaak!) ook moet bemagtig met morele en familie waardes.  Hulle gebruik weekliks individuele berading, Bybelonderrig en kreatiewe aktiwiteite.

U kan gerus op www.khuladg.co.za gaan kyk hoe daar brûe gebou word tussen verskillende groepe.

Daar lê nog baie drome en wag vir vervulling, maar Vader God weet presies van elkeen en elke nood in Suid Afrika. Wat ‘n voorreg om deel daarvan te wees in die Paarl en die VLV is opgewonde om hande te vat. Gou-gou is daar geld ingesamel vir 6 sakrekenaars vir die ‘nuwe’ leerders.

Agterna is daar luidrugtig saam gekuier by die Vroue-ondersteuningsgroep wat weekliks by Butterfly House in Paarl-Oos bymekaar kom. Drukkies is uitgedeel, foto’s is geneem en die groet was ‘n “Laat Heer u seën op hul daal… en sien julle weer!”

Marinda Rall (sirkelpresident), Bokka Wagenaar (voorsitter), Annalise Loubser (saamroeper) en Daleen Labuschagne (Kuhla spreker).

Alice Swanepoel kuier lekker saam met ‘n nuweling by Kuhla.

Sirkelpresident, Marinda Rall, help bou aan die brûe.

Thea Basson bou, so al werkende, 'n brug.

Beriggewer: Annalise Loubser
Datum: 1 November 2011

‘n Voorlesing uit Maretha Maartens se “Kersfees in ‘n stokou huis” het ons weer bewus gemaak van die Here wat voor ons elkeen staan en vra: “Wat wil jy hê moet Ek vir jou doen?”
Mag ons aan die einde van 2011 tussen die stof van die huis, almal wat net vakansie wil hou, die weergalmende Jingle Bells en vele plakkate wat kalkoene adverteer en …   elkeen by die punt kom om net een ding te vra en dit is “Here Jesus, bly by my!!”

 
‘n Voorlesing uit ‘n tydskrif oor die terugpraat en redeneer met en die uiteindelike ignoreer van ’n  GPS het vir groot pret gesorg, want dit klink so bekend!

 
Die taklede het die groot bederf om by Riverside uit te eet, baie geniet. Die gesellige saamry en saamkuier spoor ook die saamroepers aan om meer uitstappies te reël in hul portefeuljes. Bokka Wagenaar, voorsitter, is verras met pragtige blomme uit een taklid se tuin. Op haar beurt het sy weer gesorg vir ‘n mandjie vol geskenkies  – een lid trek ‘n naam wat dan ‘n geskenkie ontvang en sy trek dan weer ‘n volgende se naam. Díe wat nie ‘n geskenkie gekry het nie, kan getroos wees met die feit dat ons almal God se Liefde ontvang!

Lede met voorsitter, Bokka Wagenaar, agter 2de van links.

Portefeulje: Kuns en Handvlyt
Beriggewer: Annalise Loubser
Datum: 6 September 2011

VLV Slot van die Paarl het onlangs, tydens ‘n Kuns en Handvlyt vergadering, gekyk en geluister hoe Chantelle Swanepoel  smeltsjokolade inspan om kunswerke te maak.

1. Koop die beste kwaliteit kooksjokolade by bakwinkels; dit smaak baie beter en die sjokolade bevat minder vet.

2. Gebruik plastiekvorms (ook te kry by bakwinkels). Moenie die vorms was of  smeer nie; sjokolades se glans verdwyn. Dit sal nie vassit in die vorm nie. Vee die vorm uit met ‘n droë lap om te bêre. 

3. Smelt die sjokolade in die mikrogolfoond. Roer gereeld; wees versigtig om nie te oorverhit nie.

4. Gebruik verskillende vorms om individuele klein sjokolades te maak; die vrieskas se ysblokkiehouers werk ook.

5. Skep die gesmelte sjokolade in die vorms en sprinkel dan enige van die volgende oor: klapperskaafsels, gekapte pistasieneute (pistachio), gedroogde bosbessies (cranberry), pampoenpitte, sonneblompitte, gedroogde mango, ens. Laat dit stol in die koelkas en draai individueel toe in gekleurde foeliepapier.

6. Om ‘n hol paaseier te maak, word die sjokolade in die eiervorm geskep en die vorm word dan rondgedraai sodat die sjokolade die kante oral bedek. Sit dit vir ‘n paar sekondes in die vrieskas, draai dit weer sodat die sjokoladevorm oral ewe dik is. So ‘n halwe eier kan gevul word met tuisgemaakte klein sjokolades binne-in.

LNR Bokka Wagenaar (Voorsitter), die Kuns en Handvlyt komitee nl. Elsabé Toua, Alice Swanepoel en Salomé du Toit (by wie se huis die demonstrasie gehou is) met Chantelle Swanepoel in die middel.

VLV Slot van die Paarl het die 59ste Konferensie van Sirkel Paarl aangebied op 17 Maart 2011.

Dit was van die begin af ‘n spanpoging onder leiding van die voorsitter, Bokka Wagenaar. Aangevuur deur die tema DIE BRUID, het Slot die teenwoordiges uitgenooi om die KOMBUISTEE te geniet. Die afgevaardigdes is bederf met ‘n geskenksak (gemaak van ‘n vadoek waarvan die stiksel weer losgetrek kan word) en “Love is in the air” was teenwoordig in handgemaakte mosaïekharte.

  
Een van die taklede, Frouwien du Toit, verteenwoordig die Sirkel op die Gesondheidsfasiliteitsraad. In haar verslag het sy melding gemaak dat basiese gesondheid ‘n menseREG is. Staatsgesondheidsdienste in die Wes Kaap word gegradeer volgens 3 diensvlakke nl. vlak 1 (distrikshospitale waar voltydse dokters mediese dienste lewer saam met plaaslike klinieke in primêre sorg, geen spesialiste), vlak 2 (streekshospitale waar spesialiste ook voltyds in diens is soos bv die nuut opgeknapte Paarl Hospitaal) en vlak 3 (akademiese hospitale nl. Tygerberg, Groote Schuur en Rooi Kruis). Die hele konsep van verskillende vlak hospitale berus op die uitgangspunt van bekostigbare staatsmediesedienste en die voorkoming van opeenhoping – ‘n ‘siftingsproses’ (vanaf die kliniek kan ‘n pasiënt verder verwys word).

Om as afgevaardigde na ‘n Konferensie te gaan, is altyd ‘n voorreg, want in een dag word jy bederf in al 7 portefeuljes van die VLV en nog meer!  Hierdie keer was dit Slot van die Paarl se beurt om ook ‘n bydrae te lewer tot hierdie bederf t.o.v. die atmosfeer en die ete-en-drinke; iets waarin hulle uitmuntend geslaag het!!!!

Van Slot se wen-inskrywings.

Alice Swanepoel, sekretaris, by haar skoondogter se trourok wat 'flair' verleen het aan 'Die Bruid'-dag.

Erika Lubbe, VLVK President, oorhandig een van Slot se drie bekers aan die voorsitter, Bokka Wagenaar.

Wenner van vele pryse, Aletta Keyser, saam met Erika Lubbe, VLVK President.