Dr. C. Pienaar, plastiese en rekonstruktiewe chirurg het met VLV Velddrif se openingsvergadering, op 18 Februarie, die dames in vervoering gehad. Die baie aantreklike dokter het vir ons kom vertel van sy werk as verteenwoordiger van "operation smile South Africa". Die organisasie gaan help minderbevoorregte kinders en volwassenes, met gesplete verhemeltes en lippe reg oor Afrika. Daar word derduisende kindertjies se lewens verbeter binne net 45 minute.

Hy het natuurlik ook ‘n klein bietjie oor plastiese snykunde gepraat , maar gelukkig het VLV Velddrif sulke pragtige dames, dat ons dit glad nie nodig het nie, sê Suzanne Wessels, wat die bydrae gelewer het.

Gina en Estelle, saam met die dokter wat almal help "smile"

Komitee 2010

AGTER: Cornelia Marais (Leefstyl), Louise Jacobs (Openbare sake), Jackie Coetzee (Tesourier), Sinnie Koeglenberg (Leefstyl), Estelle de Koker (Gesondheid), Lynette Visser (Kunste en Handvlyt).
VOOR: Vera Winterbach (Landbou en Tuinbou, Vise voorsitter), Gina Smit (Voorsitter), Melinda Thiart (Sekretaresse)

Suzanne Wessels berig uit Velddrif.

Die oggend so half 10 het die ontbyt begin nadat almal eers ‘n bietjie gelag het oor van die kostuums van sommige van die dames. Die vergadering is gehou by die Foks'il in die Riviera Hotel, Velddrif. Hulle het ook die heerlike ontbyt verskaf. Ons het begin met joghurt en ‘n croissant wat jy kon vul met kouevleis of sommer net lekker konfyt en kaas. Daarna was daar ‘n gekookte eier, spek en ‘n quiche met sampioen en eier. Heel laaste het ons appeltertjies, koffie en tee geniet.

Die ontbyt is begin met die tradisionele VLV opening en gebed. Toe het Sinnie, Malinda en Jackie vir ons vertel van die geskiedenis van die VLV.

So tussen deur die etery het ons modeparade gehou met modes uit al die dekades. Eerste aan die beurt was Lynette Visser (Kunste en Handvlyt). Haar groep het 1920 tot 1930 gedoen. Hulle het die mooiste gatsby-era rokkies aangehad en een van die dames het selfs ‘n paar danspassies gedoen uit daardie era. Toe was dit Hanneke du Toit (Opvoeding en Kultuur) se beurt met die 1940’s. Hulle het baie deftig gelyk in hulle snyerspakkies en hoede. Estelle de Koker (Gesondheid) se groepie was maar klein, maar het baie mooi die 1950’s  verteenwoordig met die eerste Yves Saint Laurent sakrok.Toe begin die rebelse jare. Vera Winterbach (Landbou en Tuinbou) en haar groep het gewys wat het in die 1960 aangegaan met n bietjie "sex, drugs, rock and roll". Leticia Ellis en Gina Smit het ook lekker ge”bob”. Cornelia Marais (Leefstyl) was onherkenbaar met haar pruik as die ma van die Rosenkowich-sesling van 1970. Michael Jackson, Alf en Gene Simmons van KISS het ‘n draai uit die tagtigs kom maak. Hulle was deel van Louise Jacobs (Openbare Sake) se groep. Die bestuur het besluit hulle sal 1990 doen en Sinnie Koeglenberg (voorsitter) was skitterend as Moeder Teresa.

So om en by half 11 het ons almal ons glasies gelig en vir die VLV ‘n gelukkige verjaarsdag toegewens. Ons is toe na buite en het ballonne in die lug laat opvlieg. Die ballonne het op die grond rondgewaai en dit moes sekerlik baie snaaks gewees het vir enige persoon wat gesien het hoe ‘n klomp vrouens met vreemde uitrustings agter die ballonne aanhardloop.

Deona Huysamen het die lekkerste verjaardagkoek gebak en ons het nog daaraan gesmul terwyl van die gaste begin huistoe gaan het. Dit was ‘n heerlike oggend en almal het dit terdeë geniet.Ons sien uit na die volgende groot verjaarsdag!

Louise Jacobs (Michael Jackson)

 Die Gatsby Girls

 Suzanne Wessels (Gene Simmons), Louise, Sinnie Koeglenberg (Moeder Teresa)

  en Jackie (prinses Di)

 Verjaarsdagkoek deur Deona Huysamen

Moeder Teresa

 Daar gaan die balonne. . .

 Brêkfis

Op Donderdag, 17 September, het Velddrif se VLV tak hul jaarlikse uitstappie gehad. Die afwagting was groot met die wegtrekslag uit Velddrif - elkeen met ‘n ontbytpakkie (geborg deur die tak) bestaande uit ‘n appel, vrugtesappie, muffin en joghurt om die dag gesond te begin en kragte op te bou vir al die plesier wat voorgelê het.

Eerste  op die program was ‘n stop by Fairview Wynlandgoed. Die kelder maak die heerlikste wyne en ‘n verskeidenheid van kase, waaraan algar alte lekker geproe het. Die kelder het ook fluks sake gedoen, want ‘n mens kan mos darem nie leë hande huis toe gaan, as alles wat jy geproe het smaak na meer nie!

Volgende het ons by die Taalmonument aangedoen, waar ’n vriendelike toergids die simboliek van die Taalmonument aan ons verduidelik het. Die monument se baie trappe het veral die ouer garde so ‘n bietjie “gepootjie”, maar aan waagmoed het dit niemand ontbreek nie. Almal het piekniekmandjies saamgeneem en die lowergroen gras, was die ideale plek om ‘n kossie te geniet.

So in die ry, oppad na die volgende stop, het die dames ‘n aarbeiwinkel gewaar en daar moes net gestop word om lekker vars aarbeie en aarbeistroop te koop. Vol gelaai met die suikersoet vruggies, het die geduldige busbestuurder weer pad gevat.

Die Drakenstein Korrektiewe Sentrum, voorheen bekend as die Victor Verster Gevangenis, was ons eindbestemming. Die gevangenis het bekendheid verwerf omdat dit is waar Madiba die laaste 3 van sy 27 jaar gevangenskap deurgebring het. Die ruim huis, waar mnr. Mandela aangehou is, is redelik afgesonderd en vêr van die gevangenis af. Die huis, wat sedert 11 Februarie 1990 leeg staan,  beskik oor ‘n swembad, oefenkamer en weelderige tuin.  Mnr. Mandela het sy eie private sjef gehad tydens die 3 jaar wat hy daar woonagtig was.

Die gids het staaltjies vertel van mnr. Mandela se tyd in die huis en hoe verbaas hy was oor die mikrogolfoond, wat vir hom soos ‘n tweede televisie gelyk het. Die gaatjies vir die loer-en meeluistersapparate is stille getuienis van die  feit dat die inwoner steeds gevangene was. Hopelik is die apparate werklik ontkoppel en het niemand die dames dopgehou wat braaf genoeg was om op Madiba se bed rond te rol nie! Soos Mnr. Mandela soveel jare gelede, het die VLV lede ook deur die “Freedom Gate” gestap om weer te kon pad vat na huis en haard.

 Busvrag uit Velddrif

Angeli de Kock en Hanneke du Toit